एकै दिन २० हजार राँगा बली :

गढीमाईको राँगाको मासु काठमाडौं आउँदै :
उपेन्द्र लामिछाने, गढीमाई मन्दिर (बारा), मंसिर ९ – अधिकारकर्मी तथा धार्मिक सङ्घसंस्थाको विरोध हुँदाहुँदै पनि गढीमाई मन्दिरमा मङ्गलबार करिब २० हजार राँगालाई सामूहिक बली दिइएको छ। बिहान मन्दिरका मूल पुजारी मङ्गल चौधरीले पञ्चबली (मुसा, सुगुर, परेवा, राँगा र बोका ) दिएपछि सामूहिक बली सुरु भएको थियो।
उक्त बलीसँगै ४ विघा क्षेत्रफलमा फैलिएको बधस्थल रगतको आहालमा परिणत भएको छ। दशौं हजारको सङ्ख्यामा आएका भारत तथा नेपालका तिर्थालुले यत्रतत्र बोका तथा परेवासमेत मङ्गलबारबाटै काट्न थालेपछि मन्दिर परिसर नै रगताम्ये भएको हो। मूल पूजारी चौधरीले बधस्थल नजिकै रहेको पीपलको बोटमुनि पञ्चबली दिएका हुन्। उनले सुरुमा बोका काटेका थिए। त्यसपछि जङ्गलबाट ल्याइएको सेतो मुसालाई धारिलो खुकुरीमा राखेर घाँटी रेटे। मुसा बली दिएको दृष्य नेपाली तथा विदेशी पत्रकारले खुवै रुचीका साथ नियालेका थिए। त्यसपछि परेवा, सुगुर र राँगो हुँदै पञ्चबली समाप्त भएको थियो।
बिहान ८ बजेको पञ्चबली समाप्तिलगत्तै हातमा खुँडा लिएका ३ सयभन्दा बढी 'मारक' हरु चिच्याउँदै बधस्थलमा प्रवेश गर्दा उक्त क्षेत्र युद्ध भूमिजस्तो देखिएको थियो। पन्ध्र हजारभन्दा बढीको सङ्ख्यामा रहेका राँगाको भीडमा खुँडा–तरवार बोकेका ३ सय व्यक्तिको प्रवेशपछि त्यहाँको वातावारण कोलाहाल बनेको थियो। मारकहरुले अन्धाधुन्ध खुँडा–खुकुरी प्रहार गर्दा राँगा कराउँदै भाग्न पुगेका थिए। मार हान्नेहरुले भने आफूहरुलाई मार हान्न रमाइलो लाग्ने सुनाए । 'जति धेरै काट्न सक्यो उत्ति आनन्द महसुस हुन्छ', मार हान्दै गरेका रामलाल महतोले भने – परम्परा निभाउनका राँगा काट्न ग्रसर भएको हुँ।
यसरी मार हान्नेमा कतिपय पैशाका लागि आएका देखिन्थे भने कतिपय भने सोख पूरा गर्नसमेत धमाधम राँगा ढाल्दै गरेका देखिन्थे। बली दिएको दृष्य हेर्न दशौं हजारको भीड बधस्थलको चारैतिर झुम्मिएको थियो। मार हान्ने क्रम साँझसम्म जारी छ। आफूले चिताएको पूरा हुने कामनाका साथ भारतीय तथा नेपाली भक्तजन राँगा ल्याएको सुनाउँछन्। आफूले चढाएको राँगा मारिएकोसमेत हेर्न बसेका कतिपय राँगाको बगेको रगतसँगै आफ्नो मनोकामन पूरा हुने सुनाउँथे। भारतीय राज्य बिहारका एक व्यक्तिले १ सय ५ वटा राँगा गढीमाई मेलामा बली चढाएको समितिले जनाएको छ।
मनोकांक्षा पूरा गर्न यसरी चढाइएका राँगामध्ये मङ्गलबार मध्याह्नसम्म १५ हजारको हाराहारीमा राँगा काटिसकिएको गढीमाई मेला समितिका संयोजक शिवचन्द्र कुशवाहले बताए। राँगा ल्याउने क्रम जारी रहेकाले २० हजार पुग्ने उनको भनाई छ । मंसिर ९ र १० गते बली दिने कार्यक्रम सिद्धिए पनि मेला अझै दुई सातासम्म रहने छ।

source:nagariknews.com