मुम्बई, मंसिर ९ (एजेन्सी)- सलमान खान र ऐश्वर्या राय आज क्याट्रिना कैफ र अभिषेक बच्चनसित रमाइरहेका छन्। तर, बलिउडमा सलमान र ऐश्वर्याबीचको पुरानो प्रेमसम्बन्धको चर्चा बेलाबखत उठिरहन्छ। त्यतिमात्र होइन, अब यी दुईको कथामाथि फिल्म नै बन्ने भएको छ।
उनीहरूको असफल प्रेमकथालाई फिल्ममा उतार्ने काम निर्देशक जावेद खानले गर्न लागेका हुन्। उनको फिल्मको शीर्षक समेत जुरिसकेको छ, 'अजब है इश्क'। फिल्ममा जावेदले लगानी र अभिनयसमेत गर्नेछन्।
जावेद त्यति परिचित फिल्मकर्मी होइनन्। तैपनि सलमान र ऐश्वर्याबीचको कथा धेरैको चासो हुने भएकोले आफ्नो फिल्मको अन्तर्राष्ट्रिय स्तरमै चर्चा हुने आशा जावेदले लिएका छन्।
उनले फिल्मको क्लाइमेक्स भने नाटकीय बनाउन लागेका छन्। यथार्थमा विछोड भएपनि फिल्मको कथामा भने दुई प्रेमीबीच मिलन भएको देखाइने छ। जावेद निकै आशावादी भए पनि उनको भाग्यको निर्धारण भने फिल्म रिलिज भएपछि नै हुनेछ।
source:nagariknews
