सिन्धुपाल्चोक, भदौ २२- मंगलबार यात्रुबससहित भोटेकासी नदीमा डुबेर बेपत्ता भएकालाई दोस्रो दिन फेला पार्न
सकिएको छैन। नदीमा हराएको २५ मध्ये २२ यात्रुको परिचय खुलेको छ। बेपत्ता भएको पुष्टिपछि खोजीका लागि आफन्तहरु प्रहरी समक्ष पुगेका छन्।
कम्तिमा ३५ यात्रु बोकेर गाती बसेरीबाट बाह्रविसे आउँदै गरेको बा२ख ४०१३ नम्बरको बाह्रविसे यातायातको बस एक किलोमटिर नगुड्दै सोमबार भोटेकासी नदीमा खसेको थियो। चालकसहित चार यात्रु पौडेर बाँच्न सफल भएका थिए भने पाँचको शव भेटिएको थियो।
सोमबार रातपरेपछि स्थगित गरिएको खोजी कार्य मंगलबार बिहानैदेखि थालिएको थियो। घटनास्थलदेखि दोलालघाटसम्म करिव ५० किलोमिटरको दुरीमा टोली-टोली बनाएर खोजी गरिएको थियो। केही नभेटिएपछि खोजटोलीले साँझ स्थगन गरेर फर्किएको छ।
बस पनि भेटिएको छैन। सुरक्षाकर्मी, स्थानीयबासी र आफन्त गरी २ सय बढी खोजीमा जुटेका थिए। वर्षाका कारण नदीको सतह बढेकाले खोजीकार्यमा कठिनाइ उत्पन्न भएको इलाका प्रहरी कार्यालय बाह्रविसेका प्रहरी निरीक्षक हेरम्ब शर्माले बताए।
इक्वेटर रिसोर्ट सुकुटेका पौडीवाज टोली सात र्याफ्टिङ बुथ लिएर दोलालघाट निस्केको थियो। अरनिको राजमार्गका सबै युनिटलाई युनिटलाई खोजीकार्यमा परिचालन गरिएको थियो। ५२ जनपद, १० सशस्त्र प्रहरी र ६७ जना नेपाली सेना खोजीमा परिचालन गरिएको प्रहरी निरीक्षक शर्माले बताए।
'अब जिवितै उद्धार गर्ने सम्भावना छैन', उनले भने, 'अड्केका शव बाडीले बगाएर ल्याउने आशाले नदी नछोडेका हौं।' बुधबार पनि खोजी जारी रहने डिएसपी स्थानेश्वर देवकोटाले बताए। यसैबीच दुर्घटनामा मृत्यु भएकाहरुको शव पोष्मार्टमपछि मंगलबारै आफन्तको जिम्मा लगाइएको छ।
source:nagarik
skip to main |
skip to sidebar
