'४८ घन्टा भक्तपुर नजाऔं' :

काठमाडौ, भाद्र ६ - ठिमी, भक्तपुर, म त पाँच सय दिए पनि जान्नँ,' भक्तपुर नयाँ ठिमीस्थित घर जानका
शनिबार शान्तिनगरमा ट्याक्सी चढ्न लाग्दै गरेका यात्रुलाई बस्नबाट रोक्दै चालक भन्दै थिए, 'ठिमी यहाँबाट छ, सात किलोमिटर भए पनि जाम र खराब बाटोका कारण आउन-जान दिनभरि नै लाग्छ ।'
'बाटो बनेपछि जाउँला, अहिले त्यतातिर नजाउँ  है माफ गर्नुस्,' चालकले हात जोर्दै भने ।
तपाईं पनि फुर्सदमा अरनिको राजमार्ग हुँदै भक्तपुरको पर्यटकीय क्षेत्र, नगरकोट, तातोपानी जाने सोचमा हुनुहुन्छ भने कम्तीमा ४८ घन्टा त्यसतर्फ जाने सोच त्याग्नुहोस् ।
अरनिको राजमार्गको कोटेश्वर जडिबुटी खण्डमा विस्तार भैसकेको सडकमा शनिबार अपराह्नदेखि अन्तिम पिच हाल्ने कार्य भैरहेकाले उक्त क्षेत्रमा गाडी, मोटरसाइकल गुड्नै नसक्ने गरी जाम हुन थालेको छ । सडक निर्माण कार्यमा खटिएका प्राविधिकहरूका अनुसार थपिएको पिच सुक्न कम्तीमा ४८ घन्टा गाडी गुडाउन मिल्दैन ।
अरनिको राजमार्गको तीनकुनेदेखि सूर्यविनायकसम्मको सडक खण्ड जापान सरकारको सहयोगमा हाजमा कम्पनीले विस्तार गरिरहेको छ ।
काठमाडौंबाट जडिबुटीतर्फ जाने एकतर्फी पूरै बाटो छेकेर पिच गर्ने कार्य भैरहेकाले अर्को एकतर्फीमा आउने जाने दुवै गाडीहरू हालिएको छ । पिच गर्ने कार्य अपराह्न पाँच बजेदेखि थालिए पनि सडक भने बिहानैदेखि बन्द गरिएको थियो । शनिबार दिनभरिजस्तै पानी परेर पिच गर्ने कार्यमा बाधा पुगे पनि बिहानैदेखि रोकेको बाटो अपराह्नसम्म बिनाकाम बन्द थियो ।
शनिबार सार्वजनिक बिदाको दिन अपराह्न पाँच बजेदेखि पिच गर्न थाल्दा काठमाडौंबाट जाने गाडीहरूको लस्कर तीनकुनेमा थियो भने भक्तपुरबाट आउनेहरूको लाइन ठिमीसम्म बसेको थियो ।
कोटेश्वर प्रभाग र लोकन्थलीको ट्राफिक पोस्ट मातहतका ट्राफिक प्रहरीको निष्त्रिmयताले पनि यो
जाम झनै बढेको देखिन्छ । एकतर्फी बाटो बन्द भएपछि यसै जाम, उसै जाम भन्ने मानसिकतामा बसेको देखिन्छ । कोटेश्वर ट्राफिकले चक्रपथबाट आउने गाडीहरू तीनकुने घुमेर मात्रै भक्तपुर जान पाउने व्यवस्था गरेको थियो ।
दुवै निकायका ट्राफिकहरू आवागमन छिटो छरितो बनाउने कार्यमा भन्दा रमिता हेरेर बसिरहेका देखिन्छन् ।
कोटेश्वरका ट्राफिकहरू पिच गरिरहेका प्राविधिकहरूसँग कुराकानी गरिरहेका देखिन्थे भने लोकन्थलीका ट्राफिक दायाँबायाँ दुवैतर्फको लामो गाडीहरूको ताँती हेरेर बसिरहेका देखिन्छन् ।
लामो जाम भएका स्थानहरूमा पनि सार्वजनिक सवारीका साधनहरूले जथाभावी यात्रु चढाउने र ओराल्ने गरेकाले झनै जाम बढी भएको देखिन्थ्यो । जाम हुँदा एकै लस्करमा बस्नुपर्ने गाडीहरू जथाभावी ओभरटेक गरिरहँदा पनि ट्राफिक रमिते बनेर बसिरहेका देखिन्थे ।
'भक्तपुरबाट काठमाडौं जानेहरू पेप्सिकोला हुँदै गुह्येश्वरी निस्केर जानुभयो भने चाँडै काठमाडौं पुग्नुहुन्छ, लोकन्थलीस्थित सडकमा उभिएका एक ट्राफिक जवान हाँस्दै भन्दै थिए, 'यताबाट जानुभयो भने त तीनकुने निस्कन कम्तीमा दुई घन्टा लाग्न सक्छ । लोकन्थली र तीनकुनेको दूरी बढीमा अढाई किलोमिटर मात्रै छ ।

source:kantipur