होटल घेरेर हतियारधारी पक्राउ :

काठमाडौं, असोज १८ - होटलका ग्राहक लुट्न आएको आरोपमा प्रहरीले गोली लोड भएको पेस्तोलसहित पाँच
जनालाई पक्राउ गरेको छ। महानगरीय प्रहरी आयुक्त कार्यालयको विशेष टोलीले ज्याठा गल्लीबाट पेस्तोल र पाँच राउन्ड गोलीसहित सोमबार दिउसो उनीहरूलाई पक्राउ गरेको हो।

पक्राउ परेका काभ्रेका दोर्जे लामा, कुन्डोज लामा, जितमान तामाङ, ललितपुरका विकास लामा र सुधर्न व्यञ्जनकार महानगरीय प्रहरी प्रभाग दरबारमार्गको हिरासतमा छन्। प्रभाग प्रमुख सुदीप पाठकका अनुसार उनीहरू ज्याठाको कैलाश होटलमा रहेका एक भारतीय व्यापारी लुट्ने योजनामा थिए।

उनीहरूमध्ये दुई जना सोमबार दिउसो २ बजे मोटरसाइकलमा होटल परिसरबाहिर ओर्लिएका थिए भने बाँकी होटलभित्रै थिए। प्रहरी देख्नेबित्तिकै भाग्ने खोजेपनि होटल घेरा हालेर उनीहरूलाई पक्राउ गरेको पाठकले बताए।

पाठकका अनुसार उनीहरूको साथबाट नाइन एमएमको पाँच राउन्ड गोली लोड भएको पेस्तोल बरामद भएको छ। उनीहरूको साथबाट एक थान म्यागजिन र पाँच राउन्ड गोलीसमेत फेला परेको छ। चुडिएको सिक्रीसमेत बरामद भएकाले उनीहरू उपत्यकाको लुटपाटमा संलग्न समूहका सदस्य रहेको प्रहरीको आशंका छ।

source:nagarik