विदेशीएकाहरुले साथीसंग टिका थापेर मनाए दशैं :

काठमाडौ, आश्विन ३१ - रोजगारी र अध्ययनको शिलशिलामा विदेशिएकाहरुले समेत यसपालीको दशैं
खुशियालीका साथ मनाएका छन् । विभिन्न देशमा अध्ययनरत विद्यार्थीले इन्टरनेट र फोन मार्फत इ-कान्तिपुरलाई दिएको जानकारी अनुसार घरपरिवार भन्दा विदेशको दशैं खल्लो भएको दुःखेसो गरे । आफ्नो संस्कृतिलाई विर्सन नदिन र दशैंको याद ताजा राख्न आपसमा साथी भाई भेला भएर टिको लगाएको उनीहरुले बताए ।
 दुई बर्ष अघि डिभी परेर अमेरीकाको भर्जिनियामा बस्दै आएका उदयरपुर गाईघाटका दीपेन्द्र तामाङले गाउंकै दाजु पर्नेसंग टीका लगाएर आशिर्वाद थापेको फेसबुक मार्फत बताए । 'विदेशको दशैं खल्लो हुंदो रहेछ,'आईतवार टीका लगाएपछि अनलाईनमा भेटिएका उनले भने,'त्यही भएर घरमा बुवा ममी र दाइलाई संझदै गाउंकै नाता पर्ने दाईबाट टिका लगाएर आशिर्वाद थापे ।' उनले नेपालको झैं विदेशमा कुनै नेपालीले पनि दशैं नमानउने गरेको बताए । अष्टमीको दिन नजिकैको बजारमा गई १ सय ६५ डलरमा खशी किनेर ल्याई सबै नेपाली भेला भएर खाएको तामाङले बताए ।
उनका अनुसार आज सबै नाता पर्ने र साथीहरु भेलाइ कोठामा बसेर सांगितिक कार्यक्रम गर्ने योजना बनाएको बताए । रोजगारी र अध्ययनको शिलशिलामा लाखौं युवाहरु विदेशीएका छन् । विदेशमा रहेकाहरुले कसैले नेपालकै झैं दशैं मनाएको बताए त कसैले निधार खाली राखेर बसेको बताए । उता दुई बर्ष अघि अध्ययनको क्रममा पोर्चुगल पुगेका झापा सुरुगांका दिनेश सुवेदिले टिकाको दिन घरको बुवा ममीको धेरै याद आएको बताए । 'घरमा हुंदा साईतमै बु्वा र ममीको हातबाट टिका लगाउने गर्थे,'पोर्चुगलमा रहेका सुवेदिले भने,'तर दुई बर्ष भयो साथीहरु भेला भई आपसमा टीका लगाएर आशिर्वाद साटासाट गर्न थालेको ।' उनले दाई अमेरिकामा रहनु भएको र दिदीहरुको पनि विवाह भई सकेकाले बुवा ममीले दशैंमा खल्लो महसुस गर्ने गर्नु भएको उनले फेसबुक मार्फत सुनाए । 'दशैं आएपछि जहिले घरपरिवारको याद आउंछ,'उनले भने,'तर साथीले मलाई एक्लो महसुस हुन दिएका छैनन ।'
अधिकांश साथीहरु नेपालकै भएकाले सबैले घरपरिवारको संझना गर्दै दशैं मनाएको उनले जानकारी दिए । अनलाईनमा भेटिएका सबैले साथीभाई भेला भई दशैं मनाएको बताए । केहीले भने घरपरिवारको यादले गर्दा दशैं नमनाएको र एक्लोपना महसुस भएको बताए । 'विदेशमा त हाम्रो संस्कृतीको कुनै मतलब हुंदैन रहेछ,' अध्यनको शिलशिलामा ६ महिना अघि डेनमार्क पुगेका काठमाडौंका मनिष पौडेलले भने,'त्यही भएर हामी केही नेपाली भेला भई टीका लगाएर दशैं मनायौं ।' उनले दशैंमा ममी,बुवा र बैनी पूण्र्याको दिन सम्म विभिन्न स्थानमा रहेका इष्टमित्रकामा गई टीका लगाएर आशिर्वाद थाप्ने गरेपनि डेनमार्कमा भने नेपालीहरु एकछिन भेलाभई आधा घण्टामै दशैंको विदाई गरिएको बताए ।
उनका अनुसार डेनमार्कमा हजारौं नेपाली बसोबास गनदै आएपनि सामान्य रुपमा दशै मनाएका हुन् । अनलाईनमा भेटिएका विदेशमा रहेका सयौं नेपालीले अन्य बेला भन्दा पनि दशैं र तिहारमा नेपाल र घरपरिवारको याद धेरै आउने गरेको सुनाए । दुई बर्ष अघि अध्ययनका लागि अष्टे्रलीया पुगेका विराटनगरका प्रदिप खतिवडाले पनि परिवारसंग बसेर दशैं मनाउन नपाउंदा खल्लो महसुस भएको बताए । 'घरमा हुंदा पो दशैंको ठूलो महत्व हुंदो रहेछ,'उनले भने,'तर यहां दशैं तिहार कहिले आउंछ मतलब नै हुंदैन रहेछ । 'उनले संगै रहेका नेपाली संग बसेर सामान्य रुपमा दशैं मनाएको बताए ।

source:kantipur